ನ್ಯೂಯಾರ್ಕ್: ಕಾಫಿ ಬಾರ್ಗಳನ್ನು ನಡೆಸುವ ಜಗದ್ವಿಖ್ಯಾತ ಸಂಸ್ಥೆ ಸ್ಟಾರ್ಬಕ್ಸ್ನ ಉತ್ಪನ್ನಗಳನ್ನು ಬಹಿಷ್ಕರಿಸುವಂತೆ ನ್ಯೂಯಾರ್ಕ್ನ ನೂತನ ಮೇಯರ್ ಜೊಹ್ರಾನ್ ಮಮ್ದಾನಿ ಸಾರ್ವಜನಿಕರಿಗೆ ಕರೆ ನೀಡಿದ್ದಾರೆ. ಇದಕ್ಕೆ ಕಾರಣ ಅಮೆರಿಕದ 40ಕ್ಕೂ ಹೆಚ್ಚು ನಗರಗಳಲ್ಲಿ ಸ್ಟಾರ್ಬಕ್ಸ್ ಉದ್ಯೋಗಿಗಳು ಆರಂಭಿಸಿರುವ ಅನಿರ್ದಿಷ್ಟಾವಧಿ ಮುಷ್ಕರ. ಮುಷ್ಕರಕ್ಕೆ ಬೆಂಬಲ ಸೂಚಿಸಿರುವ ನ್ಯೂಯಾರ್ಕ್ ನಗರದ ನೂತನ ಮೇಯರ್ ಮಾಮ್ದಾನಿ, ‘ಒಪ್ಪಂದವಿಲ್ಲದೆ ಕಾಫಿ ಇಲ್ಲ’ ಎಂದು ಘೋಷಿಸಿದ್ದಾರೆ.
ಸ್ಟಾರ್ಬಕ್ಸ್ನ ವಾರ್ಷಿಕ ಪ್ರಚಾರ ದಿನವಾದ ‘ರೆಡ್ ಕಪ್ ಡೇ’ಯಂದೇ ಸಂಸ್ಥೆಯ ಉದ್ಯೋಗಿಗಳಿಂದ ಈ ಮುಷ್ಕರ ಆರಂಭವಾಗಿದೆ. ಈ ದಿನದಂದು ಗ್ರಾಹಕರಿಗೆ ಉಚಿತವಾಗಿ ಮರುಬಳಕೆ ಮಾಡಬಹುದಾದ ಕೆಂಪು ಕಪ್ಗಳನ್ನು ನೀಡಲಾಗುತ್ತದೆ. ಆದರೆ, ಕಾರ್ಮಿಕ ಸಂಘಟನೆಯು ಇದನ್ನು ‘ರೆಡ್ ಕಪ್ ಬಂಡಾಯ’ ಎಂದು ಕರೆದಿದೆ.
‘ಸ್ಟಾರ್ಬಕ್ಸ್ ವರ್ಕರ್ಸ್ ಯುನೈಟೆಡ್’ ಅಡಿಯಲ್ಲಿ ಸಂಘಟಿತರಾಗಿರುವ ಸಾವಿರಾರು ಬರಿಸ್ಟಾಗಳು ಅಂದರೆ ಕಾಫಿ ತಯಾರಕರು ನ್ಯಾಯಯುತ ಒಪ್ಪಂದಕ್ಕಾಗಿ ಆಗ್ರಹಿಸಿ ಇದೀಗ ಬೀದಿಗಿಳಿದಿದ್ದಾರೆ.
ಸಾಮಾಜಿಕ ಜಾಲತಾಣ ಎಕ್ಸ್ನಲ್ಲಿ ಈ ಬಗ್ಗೆ ಬರೆದುಕೊಂಡಿರುವ ಜೊಹ್ರಾನ್ ಮಾಮ್ದಾನಿ , “ನೌಕರರು ಮುಷ್ಕರದಲ್ಲಿರುವಾಗ ನಾನು ಸ್ಟಾರ್ಬಕ್ಸ್ನಿಂದ ಏನನ್ನೂ ಖರೀದಿಸುವುದಿಲ್ಲ. ನೀವೂ ನಮ್ಮೊಂದಿಗೆ ಸೇರಿಕೊಳ್ಳಿ ಎಂದು ಕೇಳಿಕೊಳ್ಳುತ್ತೇನೆ,” ಎಂದು ಸಾರ್ವಜನಿಕರಿಗೆ ಹೇಳಿದ್ದಾರೆ. ಸ್ಟಾರ್ಬಕ್ಸ್ನ ನೌಕರರು ಉತ್ತಮ ವೇತನ ಮತ್ತು ಸುಧಾರಿತ ಕೆಲಸದ ವಾತಾವರಣಕ್ಕೆ ಅರ್ಹರಾಗಿದ್ದಾರೆ ಎಂದು ಅವರು ಪ್ರತಿಪಾದಿಸಿದ್ದಾರೆ.
ಸ್ಟಾರ್ಬಕ್ಸ್ ಕಾರ್ಮಿಕ ಸಂಘಟನೆಯು ಸ್ಥಿರವಾದ ಕೆಲಸದ ಸಮಯ, ಉತ್ತಮ ಸಂಬಳ ಮತ್ತು ನ್ಯಾಯಯುತ ಕಾರ್ಮಿಕ ಪದ್ಧತಿಗಳಿಗಾಗಿ ಒತ್ತಾಯಿಸುತ್ತಿದೆ. ಈ ಸಂಬಂಧ ಅಮೆರಿಕದ ರಾಷ್ಟ್ರೀಯ ಕಾರ್ಮಿಕ ಸಂಬಂಧಗಳ ಮಂಡಳಿಗೆ 1,000ಕ್ಕೂ ಹೆಚ್ಚು ದೂರುಗಳನ್ನು ಸಲ್ಲಿಸಿರುವುದಾಗಿ ಅದು ಹೇಳಿದೆ.
ಆದರೆ, ಜಾಗತಿಕ ದೈತ್ಯ ಸಂಸ್ಥೆ ಸ್ಟಾರ್ಬಕ್ಸ್ ಈ ಮುಷ್ಕರದ ಪರಿಣಾಮವನ್ನು ತಳ್ಳಿಹಾಕಿದೆ. ತನ್ನ ಶೇ. 1ಕ್ಕಿಂತ ಕಡಿಮೆ ಮಳಿಗೆಗಳು ಮಾತ್ರ ಯೂನಿಯನ್ನ ಭಾಗವಾಗಿವೆ ಎಂದು ಹೇಳಿದೆ. ಹಾಗಾಗಿ ಈ ಮುಷ್ಕರದಿಂದ ವ್ಯವಹಾರದ ಮೇಲೆ ಹೆಚ್ಚಿನ ಪರಿಣಾಮ ಬೀರಿಲ್ಲ ಎಂದು ಕಂಪನಿ ತಿಳಿಸಿದೆ.
ಅಷ್ಟೇ ಅಲ್ಲ, ವಾರ್ಷಿಕ ಪ್ರಚಾರ ದಿನವಾದ ‘ರೆಡ್ ಕಪ್ ಡೇ’ ಯಶಸ್ವಿಯಾಗಿದ್ದು, ನಿರೀಕ್ಷೆಗೂ ಮೀರಿ ಕಾಫಿಗಳು ಮಾರಾಟವಾಗಿವೆ ಎಂದು ಅಮೆರಿಕ ಮೂಲದ ಸ್ಟಾರ್ಬಕ್ಸ್ ಸಂಸ್ಥೆಯ ವಕ್ತಾರರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
